(১ )
পাহৰণিত বাকি থোৱা চাহ একাপ ৰৈ যাব পাৰে
কাপৰ তলিতে
চাহ নহয় যেন চেঁচা তেজ

টোপনিত সপোন এটাই পিয়াহৰ কথা মনত পেলাই দিয়ে আৰু জাহ যায় সোঁৱৰণি

(২ )
সপোন এটা কেতিয়াবা ক্ষিপ্ৰ। কেতিয়াবা চতুৰ।

কিবা এটা পাহৰি তাক যিদৰে খেদি ফুৰোঁ
আধাভঙা সপোন এটাকো খেদি ফুৰে টোপনিয়ে

(৩ )
ফিৰফিৰীয়া বতাহত হালধীয়া চৰাই এটাই
ফল খুটিয়াই আছে বাহিৰত
ফল নহয় যেন মোৰ সপোন এটা আদবাটতে কাটি দিছে

৪)
টোপনিত মই সাৰে থাকোঁ আৰু টোপনিহীন সময়ক প্ৰশ্ন কৰোঁ