একলব্য (- দীপালী বৰা)
একলব্য
******
– দীপালী বৰা৷
গুৰু দ্ৰোণাচাৰ্যই
কাটি পেলাইছিল একলব্যৰ আঙুলি
আৰু নিশ্চিত কৰিছিল
অৰ্জুনৰ স্থিতি
ৰাজন্যৰ স্বাৰ্থ
একলব্যক ন্যায় দিবলৈ
নাছিল বেদব্যাসৰ আহৰি
কাৰণ একলব্য আছিল প্ৰজা
যাৰ থাকিব নোৱাৰে কোনো স্বাৰ্থ
থাকিব নোৱাৰে আপোন ইচ্ছা
ৰজাৰ বাবেই জীৱন প্ৰজাৰ
ৰজাৰ বাবেই মৰণ
সুশাসন আৰু সুন্দৰ দিনৰ
সপোন দেখুৱাই
আজিও আহে ৰজা
ৰাজনীতিৰ পাশাখেলত
আমাক পণ ৰাখি
কাটি পেলায় আমাৰ আঙুলি
আমাৰ সম্পূৰ্ণ হাত
নিষাদ সময়
আমি আজিও নিমাত…
