দ্বিতীয় খণ্ড: নাম-অপৰাধ

৷৷ দ্বিতীয় খণ্ড৷৷

৷৷ নাম–অপৰাধ৷৷

৷৷ প্ৰথম কীৰ্ত্তন৷৷

ঘোষা৷৷

কৰিও হৰিৰ চৰণে ৰতি৷

কলিত হৰিৰ নামেসে গতি৷৷৫৷৷

পদ৷৷

পদ্মপুৰাণৰ স্বৰ্গ খণ্ডত৷

নিৰূপি আছে কলি ধৰ্ম্ম যত৷৷

তাক শুনা আৱে একান্ত চিতে৷৷

যাৰ ইছা আছে ভৱ তৰিতে৷৷৩৪৷৷

আছে চাৰিসিদ্ধ জ্ঞানী পৰম৷

ব্ৰহ্মাৰ চাৰিও পুত্ৰ প্ৰথম৷৷

তাসম্বাক পায়া নাৰদ ঋষি৷

পুছিলা সংশয় কথা হৰিষি৷৷৩৫৷৷

ঈশ্বৰ ভগৱন্ত কৃপাময়৷

কহিছা যিটো মহাপাপচয়৷৷

কেন মতে হোৱে বিনাশ তাৰ৷

কলিত কোন পুণ্যে পাই পাৰ৷৷৩৬৷৷

কহিয়া ছেদিয়ো সংশয় যত৷

চাৰিও তোৰা মহাভাগৱত৷৷

শুনিয়া সনত কুমাৰ মুনি৷

দিলন্ত উত্তৰ মনত গুণি৷৷৩৭৷৷

গোৱিন্দৰ প্ৰিয় নাৰদ শুনা৷

ভাগৱত ধৰ্ম্ম আপুনি জানা৷৷

হৌক মোক্ষ বুলি সৱে লোকৰ৷

কৰিলা প্ৰশ্ন সংসাৰত সাৰ৷৷৩৮৷৷

যেন মতে পাৱে সংসাৰ পাৰ৷

শুনা সাৱধানে উত্তৰ তাৰ৷৷

সদায়ে এড়িল আচাৰ ধৰ্ম্ম৷

নভৈল যাৰ কিছু জাতকৰ্ম্ম৷৷৩৯৷৷

শঠবুদ্ধি যিটো জগত বঞ্চৈ৷

দম্ভ অহঙ্কাৰ সদা নুগুচৈ৷৷

সুৰাপায়ী চাতুকাৰ চাণ্ডাল৷

নিষ্ঠুৰ বাক্য বোলৈ সৰ্ব্বকাল৷৷৪০৷৷

পুত্ৰ দাৰা ধন আতেসে ৰতি৷

সৱাতো অধম যি পাপমতি৷৷

সিসৱো পাপত হোৱৈ তৰণ৷

যদি হৰি পদে লৱৈ শৰণ৷৷৪১৷৷

দেৱতো উত্তম কৰুণাকৰ৷

মুকুতি পাৱৈ যাত চৰাচৰ৷৷

যিটো থাকৈ তান দ্ৰোহ আচৰি৷

ভজিলে তাকো নিস্তাৰন্ত হৰি৷৷৪২৷৷

যিটো মন্দমতি অধম নৰে৷

হৰিৰো মহা অপৰাধ কৰে৷৷

নামত শৰণ লৱে বাৰেক৷

নামে হৰে তাৰ সৱে পাতেক৷৷৪৩৷৷

সুহৃদ হৰি নাম সমস্তৰে৷

তাৰো অপৰাধ যি নৰে কৰে৷৷

তাহাৰ ৰক্ষাৰ নাহি উপায়৷

অৱশ্যে সিটো অধোগতি যায়৷৷৪৪৷৷

হৰিয়ো ৰাখিবে নৱাৰে তাক৷

শুনিয়া নাৰদে বুলিলা বাক৷৷

নামৰ কোন অপৰাধগণ৷

লোকৰ যিটো পুণ্য কৰে ছন৷৷৪৫৷৷

পাপক সঞ্চি যায় অধোগতি৷

কহিয়ো নামৰ দ্ৰোহ সম্প্ৰতি৷৷

শুনি মুনি বাক্য বুলিলা তথা৷

পুছিলা পৰম ৰহস্য কথা৷৷৪৬৷৷

পূৰ্ব্বত কহিলা মোত শঙ্কৰে৷

প্ৰকাশিবো আক তোহ্মাৰ তৰে৷৷

শুনা যেন যেন দ্ৰোহ নামৰ৷

হৰি হৰি বোলা সমস্ত নৰ৷৷৪৭৷৷

৷৷ দ্বিতীয় কীৰ্ত্তন৷৷

ঘোষা৷৷

ঘুষিয়ো হৰি হৃদি ৰূপ ধৰি৷

নাহি আন পুণ্য নামক সৰি৷৷৬৷৷

পদ৷৷

ভকতক নিন্দা কৰৈ অধম৷

জানিবা নামৰ দ্ৰোহী পৰম৷৷

যাত হন্তে ভৈলা নামৰ খ্যাতি৷

তাৰ কি নিন্দা নামে সহে আতি৷৷৪৮৷৷

গুণনাম যত বিষ্ণু শিৱৰ৷

তাক ভিন্ন বুদ্ধি কৰৈ যিটো নৰ৷৷

নামৰ সিও মহা অপৰাধী৷

নৰকত পৰৈ দৈৱে নবাধি৷৷৪৯৷৷

যিটো পাপী কৰৈ গুৰুক হেলা৷

বেদকো নিন্দৈ যদি কোনো বেলা৷৷

নামৰ ইয়ো দুয়ো অপৰাধ৷

ভুঞ্জিৱে যাতনা নাহিকে বাধ৷৷৫০৷৷

হৰিৰ নামে কৰৈ অৰ্থবাদ৷

নামৰ মহিমা কৰৈ উছাদ৷৷

সিজনো নামৰ দ্ৰোহী পৰম৷

নৰকে পচৈ নাহি তাৰ জন্ম৷৷৫১৷৷

নামত বলে কৰৈ পাপ বুদ্ধি৷

অষ্টাঙ্গযোগে তাৰ নাহি শুদ্ধি৷৷

নাম অপৰাধী সিও পৰম৷

ভুঞ্জিবে যাতনা অনেক জন্ম৷৷৫২৷৷

ধৰ্ম্ম হোম ব্ৰত তীৰ্থত স্নান৷

যতেক আছৈ মহাযজ্ঞ দান৷৷

আক এৰে কৰে নামক সৰি৷

কতনো যাতনা ভুঞ্জিবে মৰি৷৷৫৩৷৷

নামক কীৰ্ত্তন কৰন্তে আনে৷

আন মন কৰি নুশুনে কাণে৷৷

অধক যাই সিয়ো হোৱৈ কলা৷

বাইবেক কাণত তপত শলা৷৷৫৪৷৷

নাহিকে শ্ৰদ্ধা নপাতয় কাণ৷

তাক যিটো দেয় নামক দান৷৷

নামৰ দ্ৰোহী নাহি তাত পৰে৷

ভুঞ্জাইবে যাতনা যম কিঙ্কৰে৷৷৫৫৷৷

শুনিয়া নামৰ মহিমা নীতি৷

তথাপি নামত নকৰৈ প্ৰীতি৷৷

নামৰ দ্ৰোহী সিও অহঙ্কাৰী৷

ভুঞ্জিবেক কাকে জিহ্বা উভাৰি৷৷৫৬৷৷

এহি দশ অপৰাধী নামৰ৷

আহ্মাত কৃপায়ে কহিলা হৰ৷৷

পূৰ্ব্বত সমস্ত মুনিৰ আগে৷

তোহ্মাত আৱে কৈলো অনুৰাগে৷৷৫৭৷৷

নামৰ দ্ৰোহ নেৰৈ যিটো জানি৷

পাপত পচৈ সিও মন্দ প্ৰাণী৷৷

মাতৃক ক্রোধে তেজৈ যেন অন্ন৷

দুঃখ মাত্ৰ পাৱৈ বালকগণ৷৷৫৮৷৷

এৰিয়া অপৰাধ দেৱ ঋষি৷

নামত যতন কৰা হৰিষি৷৷

নামেসে কৰিবে পৰম সিদ্ধি৷

হৰিৰ নাম জগতৰে নিধি৷৷৫৯৷৷

পুছিলা নাৰদ মুনি দুনাই৷

যাহাৰ বিজ্ঞান বৈৰাগ্য নাই৷৷

সদায়ে মজি আছৈ বিষয়তে৷

এৰাইবে নামৰ দ্ৰোহ কিমতে৷৷৬০৷৷

সনত কুমাৰে দিলা উত্তৰ৷

নামৰ দ্ৰোহী যিটো পাপী নৰ৷৷

সততে ফুৰৈ হৰি নাম গাই৷

তেৱেসে নামৰ দ্ৰোহ এড়াই৷৷৬১৷৷

স্বৰূপ শুনা ঋষি উদাসীন৷

যিজন নাম অপৰাধহীন৷৷

হৰিৰ তেৱে একে নামে তৰৈ৷

শুনৈ বা ভণৈ বা মনত স্মৰৈ৷৷৬২৷৷

কহিলা ৰহস্য মোত শঙ্কৰে৷

আক যিটো নৰে কীৰ্ত্তন কৰে৷৷

মুকুতি পাৱৈ এৰাই অপৰাধ৷

কহিলো নাৰদ নাহিকে বাধ৷৷৬৩৷৷

পৰম বান্ধৱ হৰিৰ নাম৷

যিজনে আক লৱৈ অৱিশ্ৰাম৷৷

তাৰ সাত কাৰ্য্য সাধিবে দেখা৷

প্ৰতি প্ৰতি লোৱা সাতৰো লেখা৷৷৬৪৷৷

প্ৰথমে দহিবে পাতকচয়৷

কৰিবে মহাপুণ্য অভ্যুদয়৷৷

কৰাইবে বিষয়ত বিৰকতি৷

কৃষ্ণত পৱাইবে প্ৰেম ভকতি৷৷৬৫৷৷

উপজাইবে আতি বৈষ্ণৱ জ্ঞান৷

মায়াকো দহিয়া কৰৈ নিৰ্য্যাণ৷৷

চৈতন্য মূৰ্ত্তি পূৰ্ণানন্দ হৰি৷

থৈবন্ত তেন্তে এৰে একে কৰি৷৷৬৬৷৷

তেৱেসে নাম হৈব উপশান্ত৷

কহিলো পৰম তত্ত্ব একান্ত৷৷

নাম বিনে নাহি কলিত গতি৷

কলিৰ লোক হুইবে পাপমতি৷৷৬৭৷৷

অন্যত্ৰ ধৰ্ম্মে নাহি অধিকাৰ৷

জানিবা কলিত নামেসে সাৰ৷৷

কলিত সদা নুসুমৰৈ হৰি৷

হেলাতে মৰৈ আত্মঘাত কৰি৷৷৬৮৷৷

কৃষ্ণৰ কিঙ্কৰে কহে শঙ্কৰে৷

মনুষ্য জন্মক নপায় সেন্থৰে৷৷

আকো বৃথা কৰা কিনো অভাগী৷

মাণিক্যক বিকা কাঞ্চক লাগি৷৷৬৯৷৷

কেতিক্ষণে কিবা মিলৈ বিঘাত৷

তথাপি চেতন নাহিকে গাত৷৷

আজি কালি কিবা মিলৈ মৰণ৷

হৰিৰ নামত লৈয়ো শৰণ৷৷৭০৷৷

নকৰিবা নিন্দা মোক মহন্তে৷

আসিল শাস্ত্ৰ বাৰাণসী হন্তে৷৷

তাহাঙ্ক চাই নিবন্ধিলো পদ৷

হৰি হৰি বুলি তৰা আপদ৷৷৭১৷৷

৷৷নাম–অপৰাধ সমাপ্ত৷৷২৷৷