বিষয়:জীৱন (প্রৱাল ফুকন)

বহু পালোঁ,
বহু হেৰুৱালোঁ,
বহুতো পায়ো হেৰুৱালোঁ ৷
কিবা এটা বিচাৰি নিজেই যেন হেৰাই গ’লোঁ ৷


বুকুৱেদি কেতিয়াবা সংগোপনে উজাই আহে এটা বিষ,
নিমিষতে গাঁঠি পেলায়
বিষাদ চাৱনিৰ একো একোখন মকৰাজাল,
য’ত পতঙ্গৰ দৰে বন্দী হয় জীৱনৰ ছন্দ ৷
ছন্দহীন সময় যেন দুখবিন্যাসৰ একো একোডাল সূতা ৷


সুখ যেন নীলমণি ফুকনৰ এটা কবিতা,
”এটা শংখৰ ভিতৰত আন এটা শংখ বাজি উঠা ”৷
আকিৰা কোৰোশ্বাৱাৰ এখন চিনেমা,
সহজ-সৰল জীৱনৰ পাতত কুটিলতাৰ আত্মকথা ৷
সুখৰ কোনো নিৰ্দিষ্ট জ্যামিতি নাথাকে ৷
কেতিয়াবা ই আত্মসন্তুষ্টিৰ এডাল বক্ৰৰেখা,
কেতিয়াবা পোৱা-নোপোৱা-হেৰুৱাৰ এটা বিষমবাহু ত্ৰিভুজ,
সোঁৱৰণীৰ এটা বৃত্ত ৷
কিছুমান মানুহ খুব সহজে সুখী হ’ব পাৰে,
তেওঁলোকৰ বাবে সুখ গ্ৰাফ কাগজৰ য’তে ত’তে,
মন গ’লেই বহাই দিব পৰা এটা ফোঁট ৷
কিছুমান মানুহ খুব সহজে দুখী হ’ব পাৰে ,
তেওঁলোকৰ বাবে সুখ জীৱনৰ সমন্তৰাল এডাল সৰলৰেখা ৷
কিছুমান মানুহে দুখৰ অভাৱক সুখ বুলি ভুল কৰে ৷
সুখ সুখেই,
দুখৰ অভাৱ চিন্তাহীন, নিৰুদ্বেগ ‘কিবা এটা’ হ’ব পাৰে,
সুখ হ’ব নোৱাৰে ৷
সুখ যেন নীলমণি ফুকনৰ……….

 

দৃষ্টি থাকিলে হেনো লক্ষ্য নেহেৰায় ৷
যদি সময়ৰ বলুকাত হেৰাই যোৱাই লক্ষ্য আমাৰ ?
হেৰাই যাবলৈয়ো যে এটা যাত্ৰাৰ প্ৰয়োজন !
আৰু যাত্ৰা মানেইতো প্ৰস্তুতি,
পিৰিক পাৰাক চাৱনি,
নিত্য-নতুন সঙ্গী,
বিশ্বাস আৰু সংশয়ৰ হাজাৰটা কেঁকুৰি ৷
এনে এক যাত্ৰাৰ অন্তত
লক্ষ্য হৈ পৰে গৌণ ৷

 

Subscribe
Notify of
1 Comment
Oldest
Newest Most Voted
Inline Feedbacks
View all comments
10 years ago

ভাল লাগিল…….”কিছুমান মানুহ খুব সহজে সুখী হ’ব পাৰে,
তেওঁলোকৰ বাবে সুখ গ্ৰাফ কাগজৰ য’তে ত’তে,
মন গ’লেই বহাই দিব পৰা এটা ফোঁট ৷”……সুন্দৰ ৰূপক ।