বিষয়: ঈশ্বৰ (বিচিত্ৰ বৰদলৈ)

বিষয়: ঈশ্বৰ

• বিচিত্ৰ বৰদলৈ

(১)
যোৱাকালি ঈশ্বৰক লগ কৰিব গ’লোঁ,
চেণ্ডেল খুলি
মজিয়াৰে চোঁচৰাই চাৱনি
মন্দিৰৰ ভিতৰত সোমালোঁ।
উভতি আহি দেখোঁ
মোৰ চেণ্ডেলযোৰ পিন্ধি ঈশ্বৰ উধাও।
পুজাৰীয়ে ক’লে,
প্ৰায়ে আজিকালি এনে কৰে ঈশ্বৰে
নহ’লেযে মানুহবোৰে মাটিত ভৰি নিদিয়ে……….
(২)
ঈশ্বৰ নো কি,
এটা বিশ্বাস
ধৰাহল এক্স, বীজগনিতৰ অংক !
মই ঈশ্বৰ বিশ্বাস নকৰোঁ,
মই ঈশ্বৰৰ অস্তিত্ব মানি ল’ব নোৱাৰোঁ
কিয় ? ময়ো নাজানো
হয়তো ঈশ্বৰেহে ভালদৰে জানিব…….