সন্ত্রাসবাদী সংগঠন সমীপেষু

আকৌ এবাৰ তেজেৰে ৰাঙলী কৰিলা ৰাজপথ

এনেদৰে তোমালোকে ফাকু খেলা তেজৰ

তোমালোকৰ অস্তিত্ব জাহিৰৰ প্ৰতিযোগিতাত

ক্ষত-বিক্ষত হয় নিৰীহৰ শৰীৰ।

সাপে মোট সোলোৱাৰ দৰেই

তোমালোকৰো সলনি হয় দেহৰ বৰণ,

কেতিয়াবা আলোচনাপন্থী, কেতিয়াবা আত্মসমৰ্পণকাৰী।

হত্যা-সন্ত্রাসে তোমালোকক দিয়ে একো একোখন চাৰ্টিফিকেট

‘গ্ৰেড-ওৱান’ হোৱাৰ প্ৰতিযোগিতাত

তোমালোকৰ সন্ত্রাসৰ পৰা সাৰি নাযায় শিশু,

আবাল বৃদ্ধ -বনিতা

যাৰ ভিত্তিত তোমালোকক যঁচা হয় চৰকাৰী আতিথ্য

গৃহ জিলাত তোমালোকক আদৰিবলৈ ৰৈ থাকে

অজস্ৰ জণগন।

গ্ৰেপ্তাৰ হ’লেও তোমালোক ভি.আই. পি.

তোমালোকৰ মুক্তিৰ দাবিত

তথাকথিত সংগঠনবোৰে বাহিৰ কৰে

প্ৰতিবাদৰ মিছিল ,

অধিবক্তাই বিচাৰি চলাথ কৰে

সংবিধানৰ পৃষ্ঠা

আইনৰ সুৰুঙা।

 

এনেকৈয়ে যদি দেখিছা স্বাধীনতাৰ সপোন

ল’ব খুজিছা শাসনৰ বাঘজৰী

তোমালোকৰ স্বাধীনদেশত নাথাকিব কোনো মানুহ

বিৰাজ কৰিব মাথোন নিস্তব্ধতা

মৰিশালীৰ নিস্তব্ধতা।