ইলেকচন পৰ্ব ২০১৪ (প্ৰদ্যুৎ জ্যোতি শইকীয়া)
শইকীয়া পুৰাণ (ইলেকচন পৰ্ব ২০১৪)
মধ্য প্ৰহৰ ৰাত্ৰে আৰম্ভিছোঁ উপাখ্যান
নাম যাৰ চিৰাচৰিত শইকীয়া পুৰাণ |
শুনা শুনা হে মোৰ অকবৰ সভাসদ
নেতা পালিনেতাই একাকাৰ কৰিছে কৰ আৰু পদ |
আৰম্ভিছে ভাৰত দেশে লোকসভা ইলেকচন
কোটি কোটিৰ লেনদেনেৰে প্ৰাৰ্থীৰ চিলেকচন |
ৰাহুল কাইটীৰ কথন মহিলা সবলীকৰণ
মোদীয়ে আনিছে হেনো জন জাগৰণ |
পিছে বদলিছে আমাৰ কেৰপাইৰ বচন
কদাপি নকৰে গ্ৰহণ এইবাৰ কম্বল আৰু ধন |
কলিয়াবৰত উত্থান পোৱালি গগৈৰ
মাছমৰীয়া কনফিউজদ মতা নে মাইকী গৰৈ ?
কদাপি সাম্প্ৰদায়িক নহয় আমাৰ বদৰকাই
বৰপেটা ধুবুৰী চাৰিয়া সকলোতে আনিব হিন্দুক জিকায় |
গণতন্ত্ৰত বিশ্বাসী আমাৰ মেডামজীৰ হাঁহিৰাম
পিছে বিনাদোষে অখিলে জপিছে জে’লত ৰামনাম |
যোৰহাটত অষ্টমবাৰৰ বাবে বিজয়খুৰাৰ হৈ চৈ
পিছে প্ৰাগ-ঐতিহাসিক যুগৰে দলং হেনো ভোগদৈৰ |
লখিমপুৰত হেনো জমিছে খেলা
সৰ্বা-ৰাণীয়ে লৈছে প্ৰতিশ্ৰুতিৰ বোজা |
বৰপেটাত থিতাপিছে আমাৰ মৰমৰ পাৰভেজ
অসমীয়া নাজানিলেও আছে “ক্লীন ইমেজ” |
এহিমতে আগুৱাইছে ২০১৪ৰ লোকসভা
নদাই ভদাই মিলি খাওঁ আঁহা ইলেকচনৰ পিঠাপনা |
কিমান কম আৰু ইলেকচনৰ কথা
মোৰ আকৌ শ্ৰীমতী একেবাৰে হোজা |
আজিলৈ এৰিলোঁ হে অ.ক.বৰ প্ৰজা
দেৰি হ’লেই বব লাগিব শ্ৰীমতীৰ অভিমানৰ বোজা |
