ধন-তেৰাচ (বিকাশ শইকীয়া)

 

dhanteras-1 

অফিচত ফাইনেন্স চেকচনৰ বৰুৱাক লগ পালো ।
সোণ অলপ কিনি থব লাগিব, ধন-তেৰাচ যে, আপুনিও কিনি থওক, তেতিয়া গোটেই বছৰ লক্ষ্মী বসতি কৰিব…. বৰুৱাই উচাহৰে কলে
বৰুৱাক কলো……. এক্সুৱেলি সোণৰ দাম কমিছিল যে, তেতিয়াই অলপ কিনা আছিল, এতিয়া সোণৰ দাম বঢ়াত বেচাৰ ধান্দাত আছো, কিনাৰ একদম ইচ্চা নাই ।

আবেলি ওলাই গলো চিচি দাৰ লগত, চেন্ট্ৰেল মাৰ্কেটলৈ বুলি ।
ৰাষ্টাৰ কাষে কাষে বহুত অস্থায়ী দোকান, দোকানবোৰক আগুৰি জাক জাক মানুহ । মাইক বাজি আছে । কি চলি আছে চাবলৈ এখন দোকানৰ ওচৰলৈ গলো ।

ফান্ডা একদম চিম্পল । টিকট এটা লব লাগে, ১০ ৰ পৰা ১০০ টকালৈকে, তাৰ পাছত খেল হয় । খেল মানে গুৱাহাটীৰ মীনা বজাৰৰ নিচিনা । দোকানত বহুত বস্ত সজাই থোৱা আছে । টিকটৰ নম্বৰ মিলিলে সেই নম্বৰটো থকা বস্তটো পোৱা যায়, নিমিলিলে……. বেড লাক…….
মুখেদি সৰুকৈ ওলাই আহিল…….. জুৱা

মানুহ এটা লক্ষ্য কৰিলো, ৰমেন সৌকাধৰা, যোৱাবছৰ মোৰ কোৱাটাৰত ৰং দিছিল, হাজিৰা কৰা মানুহ । ৰমেনে টিকট কিনিয়েই আছে….. ইতিমধ্যে প্লাষ্টিকৰ মগ, ফনি, এক লিটাৰৰ ফৰচুন বটল এটা জিকিছে….. আৰু এটা টিকট, বেড লাক, একো নাহিল । ৰমেন দোকানৰ ওচৰৰপৰা আহিল……
– কি ৰমেন, কিমান গল…… মই সুধিলো
– টকা আঠশ আছিল, শেষ হল, চাৰ ভালেই হল আপোনাক পালো, দুশমান দিয়কচোন
– ভাই দীপাৱলীৰ সময়, ঘৰলৈ যোৱা, লৰা-ছোৱালীক ফটকা-ফুলজাৰি কিনি দিয়া, জুৱা খেলি কিয় পইচা উৰাই আছা….. মই কলো

এজ ইউজুৱেল ৰমেনে বেয়া পালে । মই মোৰ পইচা খৰচ কৰিছো ই কোন জাতীয় চাৱনি এটা দি ৰমেন আতৰ হল । ইফালে, ধনী-দুখীয়া, পুৰুষ-মহিলা নিৰ্বিশেষে জাক জাক মানুহে টিকট কিনিয়েই আছে ।

চিচিদাই কলে….. দেৱালীত এইদৰে পাবলিকলি ভাগ্য পৰীক্ষা খেলাটো ইয়াৰ মানুহৰ পৰম্পৰা, ৰিৱাজ, কালচাৰ
– হয় , যি দেখা পাইছো মানুহবোৰ অলপ বেছিয়েই পৰম্পৰাপৰায়ণ… মই কলো

পাছফালে আকাশলৈ ফটকা ৰকেট কেইটামান উৰি গল আৰু বৰ জোৰকৈ শব্দ কৰি ফুটিলে, আকাশত ৰং বিৰঙৰ চিকমিকনি দেখা গল ।

সন্ধিয়া কোৱাটাৰত সোমালো । কি কৰিম আৰু, ফেচবুক খুলি ললো, দেবাশীষে নতুন বাইকখনৰ ফটো আপলোড কৰিছে, চিবিজি-Xtreme…….
দেবাশীষলৈ ফোন লগালো, চিধা-চিধি ডাইৰেক্ট পইন্টলৈ আহিলো
– ভাই, তিনিমাহতে ঘুৰাই দিম বুলি দহ টো যে লৈছিলি আঠমাহ আগতে, খবৰেই নাই দেখোন তোৰ
– কি টকা টকা কৰি থাক হে, ইমান দৰমহা পাৱ, মৰিলে লগত লৈ যাবি নেকি, মোৰ দহ হাজাৰ নাপালে তই কিবা নাখাই মৰিবি নেকি
– নমৰো
– তেন্তে, দিম আৰু লাহে লাহে, এতিয়া ৰাখ, বিনীতাক ডিনাৰ কৰাব লাগে খৰিকাত, পিছত কথা পাতিম…….দেবাশীষে ফোনটো থৈ দিলে

এশ-দুশ, পাচশলৈকে খুচুৰা খুচুৰিবোৰ বাদ দি হিচাপ এটা কৰিলো । চাহগছ আৰু জংঘলৰ মাজত মহ-ডাহ-ড্ৰিলাৰ-বছৰ কামোৰ সহ্য কৰি পোৱা ধনৰ এক লাখ ১২ হাজাৰ টকা ১৪ জন শুভাকাংখীৰ চন্দুকত সোমাই আছে । ইনডেফিনিট ফিক্স ডিপজিট উইডাউট ইন্টাৰেষ্ট, নো গেৰান্টি অৱ ৰিটাৰ্ণ ।

হিচাপখিনি কৰি থকা সময়তে আকৌ ফোনটো বাজিল…….. বনজিতৰ ফোন
– আৰে বিক্স কি খবৰ
– ভাল
– দিৱালী কেনেকুৱা
– বঢ়িয়া
– কোম্পানীয়ে দিৱালীৰ বনাচ-চনাচ টো দিয়েই চাগে
– পাৰফৰমেন্সৰ ওপৰত ইনচেনটিভ এটা দেৱালীৰ আগতে দিয়ে……. মই কলো
– এটা কাম কৰ, তোৰ ই-বেংকিং তো আছেই ছাগে, ত্ৰিশ এটা অনলাইন ট্ৰেন্সফাৰ কৰি দিবিচোন
– কিয়, কিবা প্ৰবলেম
– মই লেপি এটা ললো, সত্তৰ তাতে গল, ভাল কনফিগুৰেচন তাৰ তলত নাইয়েই, ইফালে নৱনীতাই ডিষ্টেন্স লাৰ্নিঙৰ কৰ্চ এটা কৰে বোলে, ফিজটো চাবমিট কৰিব লাগে, সোমবাৰে লাষ্ট ডেট, মই একাউন্ট নং পঠাই দিছো…. বনজিতে কলে

অলপ আগতে মই হিচাপ কৰা ১৪ জন শুভাকাংক্ষীৰ ভিতৰত বনজিতো এজন ।
টেটৰ চাইন্স টিচাৰ বনজিত আৰু সত্তৰ হাজাৰটকীয়া লেপটপ…….. গালফ্ৰেন্ড বনজিতৰ আৰু ফীজ মোৰ পকেটৰ ।
ধন-তেৰাচত সোণ নিকিনা এটিটিউডৰ বাবে মই মানুহটো বাৰু বেলবুং হৈ গৈছো নেকি ।

ইংলিচ ডিক্সনেৰীৰৰ প্ৰথম শব্দটো A …. A টো NO ৰে ৰিপ্লেচ কৰাৰ ৰিজলুচন এটা লৈ ললো

বনজিতৰপৰাই NO কোৱাটো ষ্টাৰ্ট কৰি দিলো । বনজিতক ডাইৰেক্ট কলো- NO
ধন-তেৰাচৰ দিনা সোণ কিনাৰ সলনি NO শব্দটো কোৱাৰ আৰম্ভনি হল ।

লক্ষ্মী আয়া বা লক্ষ্মী নহী গয়া……. কথাটোৰ মিনিং একেটাই

Leave a Reply

Your email address will not be published. Required fields are marked *

Don`t copy text!