কবিতাৰ অসুখ — মনোহৰ দত্ত
কবিতাৰ অসুখ
— মনোহৰ দত্ত
হীৰাৰ দৰে তুমি
পখিলাৰ দৰে
তোমাৰ কবিতা৷
প্ৰেমৰ সুগভীৰ বিশালতা
দুখৰ মাজতো
গোলাপৰ বাগিছা
সহজ যাৰ প্ৰেম
সহজ যাৰ এন্ধাৰ
তেঁওৱেই
আমাৰ হীৰুদা৷
প্ৰাণৰ বাঁহীত বজাই
মিঠা সুৰ
আমোলমোলাই ফুলে শেৱালি
বিষ্ণু ৰাভা উভতি অহিব
আজি গধূলি
সজীৱ সজীৱ কবিতা,
জ্যোতিৰ জ্যোতিৰে জ্যোতিষ্মান
স্বাধীনতাৰ কামনা৷
ফুলত কাঁইট
জীৱনত আঘাত
সকলো সহিবলৈ
দুখৰ স্তুতি৷
শব্দই শব্দই হাত থৈ
লগ পাওঁ
হীৰেন নামৰ কবি৷
আজি কবিতাৰ অসুখ
ধ্যান-মগ্ন হাতৰ অসুখ
শব্দৰ শৰীৰত বেথা
নাই ছন্দ
নাই চিত্ৰ-কল্প
বুকুত এজাক বা-মাৰলি
প্ৰতিটো পুৱা
প্ৰতিটো গধূলি৷
বন-বিৰিখৰ ছাঁ
যেন
একো একো একোটি
দীঘল হুমুনিয়াহ৷
প্ৰাণৰ দেউলে দেউলে
অবিৰত প্ৰাৰ্থনা৷
হীৰাৰ দৰে তুমি
পখিলাৰ দৰে
তোমাৰ কবিতা৷
