ধৰি ল’লোঁ আজি শনিবাৰ: ধ্রুৱজ্যোতি শর্মা

ধৰি ল’লোঁ আজি শনিবাৰ
শনিবাৰে ইয়াত হঁহা বন্ধ
শনিবাৰে ইয়াত হাহাকাৰ কৰা বন্ধ
আনকি শনিবাৰে বন্ধ দেওলীয়াৰ স্বৰ্গযাত্ৰাও।
আজি শনিবাৰ;
ঠিক দেওবাৰৰ আগৰ দিনটো।
আজি ইয়াত পালন কৰা হ’ব নিস্তব্ধতাৰ দিৱস।
ধৰি ল’লোঁ আজি শনিবাৰ
কেই মুহূৰ্তমানৰ বাবে কাৰ্ফিউ আঁতৰাই দিয়া হ’ব
জোৰ কৰি বজাৰ পতা হ’ব
য’ত থাকিব তেজৰ ডোঙাত লেৰেলি যোৱা পাচলি
শিবিৰৰ সন্মুখত দম খাব
চৰকাৰী ভেটা ৰখীয়াৰ দল!
আজি শনিবাৰ
প্ৰত্যাশিত দেওবাৰটোৰ আগৰ শনিবাৰ।
ধৰি ল’লোঁ আজি শনিবাৰ,
কাইলৈ দেওবাৰে
ইয়াত ৰজাৰ মেল পতা হ’ব
লাখ লাখ শৰণাৰ্থীক সাধুকথা শুনোৱা হ’ব
দেখুওৱা হ’ব বহু ডাইমেনশ্বনেল ছৱি
সপোন আৰু জীয়াই থকাৰ।
চিকুণাই ৰখা শিবিৰত বিলোৱা হ’ব
এক কেজি চাউল, এপোৱা দাইল
মৃত্যুও থাকিব কাইলৈ বহু দূৰৈত
কিয়নো কাইলৈ শনিবাৰ
ৰজাৰ হাটবাৰ।
ধৰি ল’লোঁ আজি শনিবাৰ
কাইলৈ দেওবাৰ
কালিৰ পিছত ইয়াত সপোন নাথাকিব
থাকিব কেৱল বাস্তৱ আৰু জীৱনৰ সংগ্ৰাম
চিকিৎসা শিবিৰত শাৰী পাতিব লাগিব
এটা লেমোফেন অথবা পেৰাচিটামলৰ বাবে
এপোৱা দাইলৰ ভাত হ’ব মহাৰ্ঘ্য
কাৰোবাৰ মৃত্যুত কান্দিবলৈ ইয়াত সময় নাথাকিব
কেকনি-জেকনিও হ’ব জীৱনৰে এক অংশ।
সেই সময়ত ইয়াত কেৱল মনত পেলাব পাৰিব
ৰজাই শুনোৱা সাধুকথাবোৰ।
ধৰি ল’লোঁ ৰজাৰ হাটবাৰক আদৰিবলৈ
আজিয়েই সেই আপদীয়া শনিবাৰ !!