’সাহিত্য ডট অৰ্গ’ৰ এই মাহৰ সাক্ষাৎকাৰৰ বাবে এইবাৰ লগ ধৰা হৈছিল প্ৰতিষ্ঠিত অসমীয়া উদ্যোগী আৰু ব্যৱসায়ী শ্ৰীযুত মৃদু মহেন্দ্ৰ দাসক। নিজৰ অধ্যৱসায়ৰ ফলত অতি কম সময়তেই তেওঁ একাধিক ব্যৱসায়িক প্ৰতিষ্ঠান আৰম্ভ কৰিবলৈ আৰু সুচাৰুৰূপে আগবঢ়াই লৈ যাবলৈ সক্ষম হৈছে। অসমৰ বৰপেটা জিলাৰ বাসিন্দা শ্ৰীযুত দাস বৰ্তমান বাংগালুৰুত এজন প্ৰসিদ্ধ অসমীয়া উদ্যোগপতিৰূপে খ্যাতি লাভ কৰিছে। মৃদু মহেন্দ্ৰ অটোমভিল আৰু ক্লিনমবিলিটি নামৰ দুটা অটোমোবাইল ব্যৱসায় প্ৰতিষ্ঠানৰ মুখ্য কাৰ্যবাহী বিষয়া আৰু সহ-প্ৰতিষ্ঠাপক।  তেওঁ ভাৰতবৰ্ষৰ বিভিন্ন ঠাইলৈ তেখেতৰ ব্যৱসায় সম্প্ৰসাৰণ কৰিছে। ‘সাহিত্য ডট অৰ্গ’ৰ হৈ সাক্ষাৎকাৰটি গ্ৰহণ কৰিছে ই-আলোচনীখনৰ এই মাহৰ সম্পাদক শ্ৰী অঞ্জুমণি ভৰালীয়ে। সম্পাদকে অনুলেখন কৰা উক্ত সাক্ষাৎকাৰটিৰ বৰ্ণাশুদ্ধি নিবাৰণ কৰিছে অসমীয়াত কথা বতৰা গোটৰ সদস্য শ্ৰী কলচুম বিবিয়ে। সাক্ষাৎকাৰটি পাঠকসকললৈ বুলি আগবঢ়াইছে ডাঃ হিতেশ্বৰ শৰ্মা আৰু ডঃ দ্বীপজ্যোতি বৰাই। 

সাহিত্য ড’ট অৰ্গ: আপোনাৰ বিষয়ে অলপ কওকচোন, বাংগালুৰুলৈ কিয় আৰু কেতিয়া আহিছিল। ইয়াত আপোনাৰ কৰ্মজীৱনৰ অভিজ্ঞতা কেনে? 

মৃদু মহেন্দ্ৰ দাস: মোৰ জন্ম যোৰহাটত। শিক্ষা জীৱন আৰম্ভ কৰোঁ ক্ৰমে যোৰহাটৰ গভৰ্মেণ্ট বয়জ স্কুলত আৰু তাৰপিছত জে বি কলেজত। ইঞ্জিনিয়াৰিং বিষয়টোৱে সৰুৰে পৰাই মোক আকৰ্ষণ কৰিছিল। গতিকে মই যোৰহাট ইঞ্জিনিয়াৰিং কলেজৰ মেকানিকেল বিভাগত ভৰ্তি হৈছিলোঁ। ইঞ্জিনিয়াৰিঙৰ পঢ়া শেষ হোৱাৰ ঠিক পিছতেই ২০০৩ চনত বাংগালুৰুলৈ আহিছিলোঁ। সেইসময়খিনিত মাত্ৰ মেট্ৰ’ চহৰসমূহেই অভিযান্ত্ৰিক স্নাতকসকলৰ গন্তব্যস্থান আছিল। এটা ভাল চাকৰিৰ সন্ধানতেই আহিছিলোঁ; মধ্যবিত্তীয় ঘৰৰ ল’ৰা হিচাপে খুব এটা ডাঙৰ সপোন নাছিল। চেন্নাইত Cognizant Technology ত প্ৰথম চাকৰি পাইছিলোঁ আৰু তাতেই তিনি বছৰ আছিলোঁ। কিন্তু বাংগালুৰুৱে অহৰহ আকৰ্ষণ কৰি থাকিছিল। ২০০৭ চনত ইয়ালৈ ঘূৰি আহিলোঁ আৰু iGate, Ness Technology, Symphony Services, Mphasis ৰ দৰে বিভিন্ন কোম্পানীত কাম কৰি তাৰ পিছত নিজাকৈ কিবা এটা কৰাৰ কথা ভাবিছিলোঁ। সেইসময়ত বাংগালুৰুলৈ অহা আমাৰ বেছিভাগৰে বাবে এইখন মাত্ৰ এখন ঠায়েই নাছিল, নিজৰ কৰ্মজীৱন আৰম্ভ কৰা আৰু একে মানসিকতাৰে আত্মীয় হৈ পৰা অসমীয়া যুৱপ্ৰজন্মৰ বাবে নিজৰ দ্বিতীয়খন ঘৰ হৈ পৰিছিল। ময়ো তেনেকেই ইয়াতেই থাকি গ’লোঁ আৰু বেলেগ কোনো ঠাইলৈ যোৱাৰ কথা মনলৈ নাহিলেই। 

সাহিত্য ড’ট অৰ্গ: ইয়াত গঢ়ি উঠা অসমীয়া সমাজখনৰ সৈতে আপুনি কিদৰে জড়িত হৈ আছে? 

মৃদু মহেন্দ্ৰ দাস:  স্বাভাৱিকতেই ২০০০ চনৰ আৰম্ভণিতেই বাংগালোৰত অসমীয়া মানুহখিনিৰ মাজত এটা সৰু ঘনিষ্ঠ গোট আৰম্ভ কৰা হৈছিল যিয়ে মূলতঃ আই টি আৰু সেৱা খণ্ডত কাম কৰিছিল। চহৰৰ ক’ৰবাত সেই সময়ত এজন সহযোগী অসমীয়া বিচাৰি পালেই মনটো ভাল লাগিছিল, প্ৰায়বোৰ মানুহকেই আমি চিনি পাইছিলোঁ। ২০১০-১১ চনলৈকে এই ধাৰাটো তেনেকুৱাই আছিল। লাহে লাহে সেই প্ৰবাহ বাঢ়ি আহিল আৰু আজি আমাৰ মাজত অসমীয়া চুবুৰী, একাধিক সমাজ আৰু এটা নামঘৰো আছে। মোৰ বিশ্বাস গুৱাহাটীৰ পিছত বাংগালোৰেই হৈছে সকলো স্তৰৰ সৰ্বাধিক অসমীয়া লোকে বাসকৰা ঠাই। 

সাহিত্য ড’ট অৰ্গ: নতুন প্ৰজন্মক লৈ আপোনাৰ ধাৰণা কি আৰু তেওঁলোকে কিদৰে আগবঢ়া উচিত? 

মৃদু মহেন্দ্ৰ দাস:  এইটো এটা অতি গুৰুত্বপূৰ্ণ প্ৰশ্ন। মই ভাবো নতুন প্ৰজন্ম আমাৰ সময়তকৈ বহু বেছি আগবাঢ়িছে। কৃত্ৰিম বুদ্ধিমত্তাৰ আগমন আৰু আৰম্ভণিৰ পৰাই বিভিন্ন বিষয়ৰ সৈতে চিনাকি হোৱাৰ সুবিধাই আজিৰ ল’ৰা-ছোৱালীক কেৰিয়াৰৰ লগতে জীৱনৰ ক্ষেত্ৰটো পচন্দ- অপচন্দৰ এটা বহল পৰিসৰ মুকলি কৰি দিছে। অৱশ্যে আৱেগিক বুদ্ধিমত্তাৰ শূন্যতা ইয়াৰ এটা অসুবিধাজনক দিশ বুলি মোৰ ধাৰণা। অৰ্থপূৰ্ণ সামাজিক সম্পৰ্কৰপৰা আঁতৰি থকা আৰু মানুহৰ লগত সংযোগ স্থাপন কৰিব নোৱাৰাটো এটা ডাঙৰ বিষয়, যিটো এতিয়া সকলো ঠাইৰ নতুন প্ৰজন্মৰ কাৰণেই প্ৰযোজ্য। বাংগালুৰুৰ অসমীয়া সমাজখন আৰু ইয়াৰ নতুন প্ৰজন্মৰ বিষয়ে যদি মোক সোধা হয়, তেন্তে সাধাৰণতে আমি আন বহুতো ঠাইত দেখাতকৈ ইয়াত অলপ ভাল অনুভৱ দেখা পাওঁ। আমাৰ নতুন প্ৰজন্মৰ পিতৃ-মাতৃ মাতৃভূমিৰ বাহিৰত থাকিল যদিও তেওঁলোকৰ প্ৰায় সকলোৱেই নিজৰ ল’ৰা-ছোৱালীক অসমৰ সৈতে একাত্ম কৰি ৰাখিছে। মই দেখিছোঁ নতুন প্ৰজন্মৰ বেছিভাগ ল’ৰা-ছোৱালীয়ে মাতৃভাষা জানে আৰু কথাও পাতে। আমাৰ পৰৱৰ্তী প্ৰজন্ম বাংগালুৰুৰ আশাকৰা মতেই আগবাঢ়ি আহিছে, পেছাগতভাৱে নিজকে ভাল স্থান দিছে আৰু শিক্ষা, ক্ৰীড়া, সংস্কৃতি আৰু ব্যৱসায়কে ধৰি সকলো ক্ষেত্ৰতে ভাল নাম কৰি আহিছে। মোৰ বিশ্বাস যে বাংগালুৰুৰ অসমীয়া ল’ৰা-ছোৱালীখিনিয়ে ভৱিষ্যতেও সকলো ক্ষেত্ৰতেই আৰু সন্তোষজনক কাম কৰি আমাক গৌৰৱান্বিত কৰিব। 

সাহিত্য ড’ট অৰ্গ: এগৰাকী উদ্যোগী হোৱাৰ উপৰিও আপোনাৰ কেতবোৰ বিশেষ চখ আছে। এই সম্পৰ্কে আমাক অলপ জনাবনে? 

মৃদু মহেন্দ্ৰ দাস:  মোক আকৰ্ষণ কৰা বস্তুবোৰৰ তালিকা বৰ দীঘল নহয়। আগতে মই গাড়ী চলাই বিভিন্ন ঠাইৰ অন্বেষণত ওলাই গৈছিলোঁ। সেয়া ২০১০ চনৰ আৰম্ভণিৰ কথা, একাধিক ‘লং ড্ৰাইভ’ কৰা হৈছিল যিটো এতিয়াৰ দিনত সাধাৰণ কথা। ইয়াত নিজকে প্ৰতিষ্ঠা কৰিব বিচৰা যুৱ প্ৰজন্মৰ বাবে বহুতো নেটৱৰ্কিং ইভেণ্ট আৰু প্ৰগ্ৰেম আয়োজন কৰিছিলোঁ। শেহতীয়াকৈ ৰন্ধন প্ৰণালীৰ প্ৰতি মোৰ আগ্ৰহ বাঢ়িছে। ৰন্ধা-বঢ়া মানে বৰ বিশেষ কিবা নহয়, কিন্তু কিছু অনুশাসন আৰু পৰিপাটি ধৰণেৰে দিনৰ কামখিনি কৰা। ৰন্ধা-বঢ়াৰ জৰিয়তে মোৰ স্বাস্থ্য সন্মত খাদ্যাভ্যাস গঢ়াৰ প্ৰতিহে মই এতিয়া অধিক আগ্ৰহী। 

সাহিত্য ড’ট অৰ্গ: নিজে কিবা এটা নতুনকৈ আৰম্ভ কৰাৰ কথা কেনেকৈ মনলৈ আহিল? আপোনাৰ প্ৰতিষ্ঠানৰ বিষয়ে অলপ কওকচোন। 

মৃদু মহেন্দ্ৰ দাস:  এইটো প্ৰশ্নৰ সহজকৈ উত্তৰ দিয়াটো কঠিন। উদ্যোগীকৰণ পৰিৱেশৰ কাৰকৰ ওপৰত নিৰ্ভৰ কৰে। কিন্তু, সঠিক কাৰণটো কোৱাৰ আগতে সন্মুখীন হোৱা সমস্যাসমূহৰ বিষয়ে জনাটো প্ৰয়োজনীয়, যিবোৰ সমাধানৰ কৰাৰ দৃঢ়তাই এজন উদ্যোগীৰ সৃষ্টি কৰে। 

 আমি ২০১৩-২০১৫ চনৰ ভিতৰত টেকন’লজী আৰু বিজনেছ ফিল্ডত নতুন নতুন কাহিনী আৰম্ভ হোৱা দেখিবলৈ পাইছিলোঁ। অ’লা, ফ্লিপকাৰ্টৰ দৰে ভাৰতীয় কোম্পানীয়ে ঘৰুৱা কোম্পানী হিচাপে অপৰিসীম গ্ৰহণযোগ্যতা আৰু প্ৰশংসা লাভ কৰিছিল। আমোদজনকভাৱে এনেধৰণৰ বেছিভাগ কাৰ্যই বাংগালুৰুৰ পৰা আৰম্ভ হৈছিল, সেয়েহে সেই ঢৌৰ প্ৰভাৱো বাংগালুৰুত পৰিছিল। লগতে, অটোমভিল আৰম্ভ কৰাৰ কাৰণ আছিল মোৰ গাড়ীৰ চাৰ্ভিচিঙৰ ক্ষেত্ৰত হোৱা বিৰূপ অভিজ্ঞতা। এইধৰণৰ সমস্যা সমাধান কৰা আৰু তাৰ বিকল্প বিচাৰিবলৈ বাধ্য হোৱা কথাটোৱে মোক অনুপ্ৰাণিত কৰিছিল। ২০১৬ ত বাংগালুৰুত এনেকৈয়েই অটোমভিল আৰম্ভ কৰোঁ। প্ৰথম এবছৰৰ বাবে কেৱল ডাটা সংগ্ৰহ কৰিবলৈ আৰু অটোমোটিভ আফটাৰমাৰ্কেটৰ গোটেই প্ৰক্ৰিয়াটো বুজিবলৈ মই দুজন ইণ্টাৰ্ন লগত লৈছিলোঁ। তাৰ পাছত আৰু পিছলৈ ঘূৰি চোৱা নাই। অটোমভিলক অট’মবাইল চাৰ্ভিচৰ ক্ষেত্ৰত ‘One stop solution’ বুলি ক’ব পাৰে। বৰ্তমান বাংগালুৰু, গুৰগাওঁ, হাইদৰাবাদ, মুম্বাই, পুনে, কলকাতা, জয়পুৰ, ৰাচী, পাটনা আৰু গুৱাহাটীত অটোমভিলৰ শাখা আছে। অহা ৫ বছৰত আৰু কমেও বিশখন চহৰলৈ ইয়াক সম্প্ৰসাৰিত কৰাৰ পৰিকল্পনাও আছে। ২০২৩ চনত বাংগালুৰুত স্থাপিত দ্বিতীয়টো কম্পেনী হ’ল ক্লিনমবিলিটি, যিটোৱে ইভি কেয়াৰ আৰু চাপ্লাই চেইনত এক নতুন যুগৰ সূচনা কৰিছে। আমাৰ মূল লক্ষ্য হ’ল top-tier EV maintenance। 

সাহিত্য ড’ট অৰ্গ: অসমত এই ধৰণৰ চিন্তা এটা কৰিব পৰা যায়নে? 

মৃদু মহেন্দ্ৰ দাস:  নিশ্চিতভাৱে অসমত এনে ধৰণৰ মডেলত কাম কৰিব পৰা যায় আৰু ইতিমধ্যে এনে কাম কৰা কোম্পানী আছে। অটোমভিলৰ গুৱাহাটীতো এটা শাখা আছে আৰু অসমৰ ডিগবৈ পৰ্যন্ত আমাৰ সেৱা উপলব্ধ। হাৰ্ডকোৰ প্ৰযুক্তিৰ বস্তুৰ বাহিৰে বেছিভাগ ব্যৱসায়ৰ বাবে আমাক মাত্ৰ নিষ্ঠা, অনুশাসন আৰু কঠোৰ পৰিশ্ৰম কৰা মানুহৰ প্ৰয়োজন। AI যুগত কামবোৰ শিকিবলৈ সহজ হৈ পৰিছে। 

সাহিত্য ড’ট অৰ্গ: বৰ্তমান অসমত নিবনুৱা সমস্যাই যুৱ সমাজক প্ৰায় কোঙা কৰি তুলিছে। আপোনাৰ ক্ষেত্ৰখনে কেনেদৰে নিবনুৱা সমস্যাক ৰোধ কৰিবলৈ সক্ষম হব বুলি আপুনি ভাবে? 

মৃদু মহেন্দ্ৰ দাস:  বৰ্তমান সময়ত অৰ্থনীতিৰ বৃদ্ধিৰ লগে লগে আমাৰ হাতত নিয়োগৰ নতুন সুযোগ আহিল আৰু তাতোকৈ গুৰুত্বপূৰ্ণ কথাটো হ’ল “স্ব-নিয়োগ”ৰ বিভিন্ন বিকল্পও আমাৰ সন্মুখলৈ আহিল। যদি আমি আত্মনিয়োগৰ লগত জড়িত হব বিচাৰো তেন্তে যুৱক-যুৱতীসকলৰ বাবে logistic, supply chain, services and hospitality ৰ দৰে খণ্ডত বহুত নতুন সুযোগ আহি আছে। কোৱাতকৈ কৰাটো সহজ আৰু যদি কোনোবাই এই খণ্ডসমূহ ওচৰৰপৰা পৰ্যবেক্ষণ কৰে তেন্তে সেই খণ্ডসমূহৰ আগতীয়া সুযোগসমূহ গ্ৰহণ কৰাটো সহজ হ’ব। আনহাতে অৰ্থনৈতিক পৰিৱেশ সলনি হোৱাৰ লগে লগে আগবাঢ়ি যোৱাৰ অন্যতম মুখ্য পথ হৈছে আত্মনিয়োগ। বিশেষকৈ অসমৰ ক্ষেত্ৰত য’ত আত্মনিয়োগক হেয় দৃষ্টিৰে চোৱা যায়, আমি ইয়াৰ প্ৰতি আমাৰ দৃষ্টিভংগী সলনি কৰিব লাগিব। আজিৰ সময়ত অসম বা বহুলভাবে উত্তৰ-পূৰ্বাঞ্চলত অনুদান, জামিনমুক্ত ঋণ আদি চৰকাৰী আঁচনিৰ ৰূপত আৰ্থিক সুবিধাও উপলব্ধ হৈছে। 

সাহিত্য ড’ট অৰ্গ: আপোনাৰ ক্ষেত্ৰখনত নতুন নতুন কি পৰিবৰ্তন আহিছে? 

মৃদু মহেন্দ্ৰ দাস:  আন যিকোনো ক্ষেত্ৰৰ দৰেই ইয়াতো যথেষ্ট পৰিৱৰ্তন দেখা গৈছে। য’ত এটা খণ্ড হিচাপে চাৰ্ভিচ বৃদ্ধি পাইছে, নতুন গাড়ীৰ অধিক বিক্ৰী, চাৰ্ভিচ চাইক’ল বৃদ্ধি, গাড়ীৰ যত্নৰ প্ৰতি কম মনোনিৱেশ (বিশেষকৈ টায়াৰ ৱান চহৰত) আৰু লাভজনকভাৱে চলাবলৈ গেৰেজৰ ওপৰত খৰচৰ হেঁচাৰ বাবে অটোমোটিভ আফটাৰচেলছত প্ৰভাৱ পৰিছে। বাণিজ্যিক খণ্ডত ইভিৰ প্ৰৱৰ্তনে আমাৰ বি টু বি ব্যৱসায়ক যথেষ্ট তললৈ নমাই আনিছে। কিন্তু এনে এটি কথাই আমাৰ বাবে ইভি ছেগমেণ্টতো নতুন সুযোগ কঢ়িয়াই আনিলে। আমাৰ এটা নতুন ছেগমেণ্ট আছে যিটো www.kleanmobility.com ৰ জৰিয়তে চলোৱা হয়। আমি এতিয়া লাষ্ট মাইলৰ ডেলিভাৰীৰ বাবে বিভিন্ন কোম্পানীয়ে চলোৱা ২ৱাট আৰু ৩ডব্লিউ ইভি বাহনৰ বাবে ইভি স্পেয়াৰৰ অন্যতম বৃহৎ যোগানকাৰী। 

সাহিত্য ড’ট অৰ্গ: আপোনাৰ ভৱিষ্যত পৰিকল্পনা কি? 

মৃদু মহেন্দ্ৰ দাস:  আমি বহনক্ষম গতিশীলতাৰ (sustainable mobility) লগত জড়িত হৈ থকা সকলো সেৱা গ্ৰহণ কৰাৰ দিশত কাম কৰি আছোঁ। ই হ’ব পাৰে চাৰ্ভিচ, ইভিৰ বাবে অতিৰিক্ত অংশ, বেটাৰী আৰু চাৰ্জাৰৰ উপাদান, বিক্ৰীৰ পিছৰ ৱাৰেণ্টী ইত্যাদি। আমি ইতিমধ্যে এটা সুস্থিৰ স্থান পাইছোঁ যদিও ব্যৱসায়ৰ সামগ্ৰিক পৰিসৰ উন্নত কৰাৰ প্ৰয়োজন আছে। আমাৰ বাংগালুৰু আৰু দিল্লীত গুদাম আছে; এতিয়া পূব আৰু পশ্চিমত আৰু দুটা গুদাম স্থাপন কৰিবলৈ বিচাৰিছোঁ। ইয়াৰ বাহিৰেও আমি কাম কৰি থকা বিভিন্ন প্ৰকল্প আছে, তাৰে এটা বিশেষভাৱে উল্লেখযোগ্য হ’ল উত্তৰ-পূব ভাৰতৰ নদী পৰিবহণৰ উন্নতিৰ দিশত কাম কৰা। 

সাহিত্য ড’ট অৰ্গ: আপুনি বিভিন্ন বঁটাৰে সন্মানিত হৈছে। আপোনাৰ কৰ্মক স্বীকৃতি দিয়া হৈছে। এইবিষয়ে অলপ কবনে? 

মৃদু মহেন্দ্ৰ দাস:   NEDFi– ভাৰত চৰকাৰে NEDFI ৰ সহযোগত আমাক উত্তৰ পূৰ্বাঞ্চলৰপৰা উদীয়মান উদ্যোগী হিচাপে স্বীকৃতি দিয়ে আৰু মিজোৰামৰ আইজলত অনুষ্ঠিত হোৱা ষ্টাৰ্ট-আপ মিটত পি এম মোদীয়ে আমাক সম্বৰ্ধনা জনায়। NVCL ফাণ্ডত পুঁজি লাভ কৰা অটোমভিল  হৈছে প্ৰথমটো কোম্পানী। ইয়াৰ বাহিৰেও মই আন বিভিন্ন  উদ্যোগীক সংগঠনৰ লগত উপদেষ্টা আৰু সদস্য হিচাপে জড়িত। 

সাহিত্য ড’ট অৰ্গ: উদ্যোগীকৰণৰ ক্ষেত্ৰখন প্ৰকাশ আৰু প্ৰতিষ্ঠা কৰাৰ ক্ষেত্ৰত আমাৰ দৰে ই-আলোচনীৰ কি ভূমিকা হ’ব পাৰে বুলি আপুনি ভাবে? 

মৃদু মহেন্দ্ৰ দাস:  স্থানীয় ভাষাত ই-আলোচনী এখন উলিয়াই থকাটো খুবেই প্ৰশংসনীয় প্ৰচেষ্টা। দুখৰ বিষয় যে ডিজিটেল জগতখন সস্তীয়া মনোৰঞ্জন আৰু অগঠনমূলক বিষয়বস্তুৰে ভৰি আছে যিয়ে কিশোৰ, যুৱকসকলৰ এটা চামক নিষ্ক্ৰিয় কৰি পেলাইছে। গঠনমূলক কিবা এটাৰ প্ৰতি মনোযোগ আকৰ্ষণ কৰাটো কঠিন কাম। আনকি অসমীয়া যুৱক-যুৱতীসকলৰ মাজত ১% পাঠক সংখ্যাই ই-সাংবাদিকতাৰ দিশলৈ এক নতুন বাৰ্তা আনিব পাৰে আৰু ই-কণ্টেণ্টৰ দিশত এক ইতিবাচক ভৱিষ্যতৰ সম্ভাৱনা কঢ়িয়াব পাৰে। এই প্ৰচেষ্টাক জীয়াই ৰখা অতি প্ৰয়োজনীয়। 

ই-আলোচনীৰ মাধ্যমেৰে বিভিন্ন ক্ষেত্ৰৰ সম্ভাৱ্য ব্যৱসায়িক পথ আৰু তাতোকৈ গুৰুত্বপূৰ্ণ কথাটো হ’ল উদ্যোগীসকলৰ বাবে উপলব্ধ অনুদান আৰু আঁচনিসমূহ প্ৰকাশ কৰিব পাৰি। “freebies”ৰ দিনত যদি মানুহে বিনামূলীয়া ব্যৱসায়িক অনুদান/ঋণৰ ওপৰত গুৰুত্ব দিয়ে তেন্তে ই অধিক গঠনমূলক হ’ব। লগতে অসমৰ উদীয়মান ব্যৱসায়ীসকল আৰু সৰু চহৰ, গাঁৱৰ ব্যৱসায়িক সফলতাৰ কাহিনী প্ৰকাশ কৰিব পাৰি যিটো যুৱক যুৱতীসকলক প্ৰেৰণা যোগোৱাৰ দিশত এক বৃহৎ পদক্ষেপ হ’ব বুলি মোৰ বিশ্বাস। 

সাহিত্য ড’ট অৰ্গ: আপোনাৰ বহুমূলীয়া সময় দি আপুনি আমাক ধন্য কৰিলে। আপোনাৰ ব্যতিক্ৰমী কৰ্ম তথা আপোনাৰ দৰ্শনে আমাক তথা আমাৰ পাঠকসকলকো নিশ্চয়েই উপকৃত কৰিব। আপোনাক পুনৰবাৰ ধন্যবাদ জনালোঁ। 

মৃদু মহেন্দ্ৰ দাস: ‘সাহিত্য ড’ট অৰ্গ’ ই-আলোচনীখনৰ মাধ্যমেৰে অসমীয়া ভাষা সাহিত্যৰ সম্প্ৰসাৰণৰ দিশত আপোনালোকে কৰি অহা চেষ্টাৰ বিষয়ে জানিবলৈ পাৰি যথেষ্ট সুখী হৈছোঁ। ‘সাহিত্য ড’ট অৰ্গৰ সমূহ সদস্যলৈ মোৰ আন্তৰিক ধন্যবাদ। আপোনালোকৰ ই-আলোচনীখনৰ উজ্জ্বল ভৱিষ্যত কামনা কৰিলোঁ।