ইচ্ছাবোৰ কিয় এনে হয়

পূৰণ নহয় বুলি জানিও

পূৰণ হোৱাৰ আশাত বন্দী হয়

যেনেকৈ বন্দী হৈ থাকে

আদহীয়া শৰীৰত

এটি কিশোৰী মন !

কিয় এনে হয় …

যাৰ ওচৰলৈ যাবলৈ তোমাৰ ইচ্ছা

তাৰ বাহিৰে যে সকলোলৈকে যোৱা

যি কাম আচলতে কৰিবৰ মন

সেয়া তুমি দূৰলৈ ঠেলি

বেছিভাগে ভালপোৱাটোকে কৰা

যদিও তুমি হতাশ হোৱা !

হৃদয়ত আঁচোৰ লাগিলেও

তেজ বিৰিঙিলেও

কোনো কথা নাই…

নিগনি দৌৰত

ভাগ ল’বই যে লাগিব

কিয় ইমান ভয় ?

আনে কি ক’ব সেই ভাবি !

সুখী হোৱাৰ ভাওঁ দি

ইচ্ছা বোৰক অৱহেলা কৰি

এৰাই চলা, নহয় নে ?

ইচ্ছাবোৰো বৰ নিলাজ

তথাপিও পৰি ৰয়

মনৰ কোনোবা এচুকত ।

ইচ্ছাবোৰে মাজে মাজে

ধৰফৰাই ,উকমুকাই

আগন্তুক মৃত্যু ভয়ত …

কৃষ্ণগহ্বৰৰ পৰা যেন

ওলাই আহিব খোজে

জীৱন বিচাৰি !

একাঁজলি পোহৰ বিচাৰি !!

……….