সময় সূৰুযে

নিৰ্দ্ধাৰণ কৰা পথেৰে

ৰুণজুন ৰুণজুনকৈ

হাতত সাৰে ভৰিত সাৰে

পাৰ হৈ যায় প্ৰহৰ 

সময় বলুকাত পৰি ৰয় মাথোঁ

এটি দুটি মুকুতা মণি ৷

ৰূপান্তৰৰ সূত্ৰ মানি

সময়ে উপহাৰ দিয়া 

আঁকবাক মকৰাজাল 

ক্ৰমাৎ ধূসৰ হৈ পৰা দৃষ্টি

ৰূপালী কেশৰাশি

স্বচ্ছন্দে আঁকোৱালি লৈ

অনিৰূদ্ধ এই জীৱন যাত্ৰা ৷

হৃদয়ৰ বৰপেৰাত

তৰপে তৰপে সঞ্চিত

এবোজা জুনুকাৰ জুনজুননি

অহৰহ বুকুত কঢ়িয়াই

জীৱনবৃত্তৰ পূৰ্ণতাৰ দিশে

এখোজ অগ্ৰগামী যাত্ৰা 

জীৱনৰ জীয়া কেঁকুৰি ৷

কেঁকুৰিৰ ভাঁজত উদ্ভাসিত

মুঠি মুঠি শুভাশিস

সজল স্নেহধাৰা

মঙ্গল বাণীৰ অনুৰণনেৰে

সুবাসিত হৃদয়ৰ আঁচল

জীৱনবৃত্তৰ হেঁপাহৰ সুহুৰি

জীৱন যাত্ৰাৰ অদম্য সাহ ৷